Kumpulan Contoh - Contoh Puisi Bali Anyar
Puisi Bali Anyar punika wantah sastra sane kaangge nartaang pabesen, ngangge basa sane bawak nanging dagingne padet. Puisi puniki sastra sane kakomunikasiang boya ja gatra, sakewanten karya sastra sane madaging rasa muah napi sane kacingak indik kahuripan, nglimbakang tur najepang kontak-kontak ring sane katerapin.
Contoh - Contoh Puisi Bali Anyar :
1. Nenten Sujati
Dinane wengi
Pedidi, ngrasayang manah ring hati
Sepi
Punika sane rasayang jani
Peteng gumi tanpa matan ai
Sekadi dammar sane nenten nyunarin hati
Dini
Mamargi nuju genah sane becik
Nanging
Ten wenten sane ledang nerima
Ten wenten sane satya masawitra
Munyi manis stata kemikan
Olih : Ni Wayan Yulia Ayu Andreani
2. Langit Peteng
Sanja lakar peteng
Matan ai mulai kelem
Kedis-kedis mulih ka umahne
Langit suba peteng
Masisa ambu sane saru
Bulan suba nganti matan ai
Bintang bintang matamburan dilangite
Angin di petengne sane dingin
Ngaba embun di don-don
Inget teken kenangan sane luung
Sing nawang, apa sane ada di otak tiange
Munyi angin sane magesek don jak ranting
Akejep ngalihin perhatian tiange
Munyi munyine to gending peteng ne luung
Langite bek teken bintang bintange
Bulan sane nyinarin langite
Ngawinang luung langit peteng
Olih : Doewie Lola
3. Majalan Masuk
Matan ai suba menek
Siap suba mamunyi
Macihna dinane niki
Sampun semeng
Tiang lakar majalan masuk
Satonden majalan
Masuk
Tiang… mapamit teken
Meme miwah bapa
Olih : Ni Kadek Ratna Dewi
4. Meme
Meme
Sesukat meme ngalahin mati
Titiang jani…
Padidi…
Tusing ada meme di samping tiange
Titiang jani….
Ngajak meme baru
Meme barune… tusing demen teken titian
Meme..
Ane jani titiang rindu
Rindu tekening meme
Olih : I Gede Pasek Krisna
5. Pasih
Dija iraga ngidang nyingakin
Bias putih lan yeh sane jernih
Dija iraga ngidang nyingakin
Matan ai sane galang
Dija ombak magirangan
Uling kangin
Ngaba yeh mauyutan
Lan bias pasih sane luung
Semengan lan peteng
Be be ne pada liang magirangan
Ditu di pasih
Olih : Marta
6. Meme
Ritatkala meme mobotang titiang
Meme nenten taen ngrasayang ane madan pakewuh
Kanti titiang lekad ka gumine
Mangkin titiang suba kelih
Titiang tusing nawang apa apa
Meme sane ngajahin titiang kanti titiang bisa
Titiang sesai ngae meme pedih
Nanging meme tusing taen pedih teken titiang
Meme ne sesai negur titiang ritatkala titiang pelih
Jani titiang suba nawang,, arti kasih saying memene teken titiang
Titiang ngidih pangampura tekening meme
Yening titiang ngelah pelih
Olih : Ni Wayan Sulistyawati
7. Jagat Bali
Jagat Bali…
Patut iraga lestariang
Apang tusing jagate
Usak turin daki
Yening jagate usak
Jagate lakar keni blabar
Blabar punika
Banjir, tanah longsor, linuh
Tur sane tiosan
Olih krana keto
Iraga patut nyaga tur ngelestariang
Jagat Bali
Olih : Tri Angarani
8. Ujan Bales
Ritatkala
Matan ai ne makere tuun
Katak dongkang
Macanda pada girang
Kelap-kelep di langite
Di gulem sane tebel
Yeh tukade maluab
Dini gumine peteng dedet
Olih : Suartiningsih
9. Basa Bali
Tan uning titiang ring karanan ipun,
Suksman titiange kategul antuk benang sutra,
Ngranjing manyusup tulang ngantos ka sumsum,
Sane dados bagian awak titiange.
Sareng maurip saking ayunan ngantos kelih,
Seduke ngipi, mamanah tur ngamedalang rasa,
Ring sajeroning basa ibu,
Manah titiange sampun kelih antuk cayane,
Kaborbor sukman titiange antuk cayane,
Titiang manggihin pribadin titiange,
Titiang magubugan ring masyarakat,
Terus masemetonan sareng sawitra,
Baktin titiang ring rerama nenten ja kirang,
Kasih-kinasih sareng alit-alite,
Sane encen kirang kapikayunin,
Titiang nyelipang raos anyar,
Anggen titiang payas sane cocok ring kala puniki,
Kapanggih rupanipun ngenyagang manah.
Olih : Suntari Pr
10. Tri Hita Karana
Tri Hita Karana
Srana papahayu jagat
Dresta luih patut kasungkemin
Parihyangan, palemahan, lan pawongan
Atur suksma, majeng krama wong Bali
Ngiring ajegang, anggen titi pangancan
Mangupadi rajeg Bali budaya luhur
Swastyastu, atur pangebaktin titiang
Dreda suci heneng heninging budi
Lungguh linggih Ida Hyang Paramakawi.
Olih : I.B. Rai Putra
11. Ngidem
Peteng karasayang manahe
Tan uning ring punapa-punapi
Tejan sang surya tan kacingak
Saantukan ngidem
Warna-warni warnan I bunga
Sane satata ngulangunin manah
Sami nenten kauningin
Saantukan ngidem
Ngideme ngranayang sengsara
Patigrapa patigrepe ngelarang kauripane
Tan sida ngruruh tetujon ne utama
Kedatang ngideme
Apanga galang deweke
Prasida uning ring angga
Uning ring sarira
Olih : Andre
12. Rerama
Nenten uning ipun ring pakewuh
Miara titiang kantos matuuh
Angkihan katohang
Nenten ngitungang kawaliang
Sangkaning rasa tulus
Ring kawentenan sentanane
Tan sida kagentosin
Rah manunggal ring angga
Rasa suksma kaaturang
Majeng ring sang Guru
Guru Rupaka kasengguh
I Meme I Bapa
Reramane sujati
Olih : Adi Andre
13. Sang Hyang Widhi
Ida sane nitahang
Sane ngaryanin, sane ngaleburin
Matan ai, bulan, bintang sahananing daging jagat
Acintya warnanya
Sane tan kekayunin
Tan wenten sane uning
Nanging bhakti kasembah
Wiapi wiapaka kasengguh
Nyusup ring sahananing sarira
Ngebekin gumi Ngebekin langit
Sami pada manunggal.
Olih : I Ketut Adi Andre
14. Buin Kesep Yén Tuah Sing Resep
Galang kangin
Langité enu masaput sutra barak
Masepuh emas pakenyornyor
Ngaléncok di muncuk-muncuk kayuné
Nanging I Kecétrung suba manying mangényor
Matinggah di padiné kuning ngerinying
Ané masoca damuh mawastra selaka
Béh...
Kabilbil I Surya kapupungan
Kadundunin olih I Cerukcuk,uyut
Ngetaraang ebon kopiné maseduh
Di Kubun-kubun cariké
Tatkala petaniné matekap
Dini tiyang
Nyongkok padidi di pemaron jelingjingé
Kalangen ninggalin dauhé ené
I Lelakut Somi,manelektek tan makejepan
Mirib ia nyambatang,”ragané manyama ngajak tiyang,
Ngajak cariké,ngajak semengané ené
Nanging
Dini tiang niisang yéh mata
Di tungtunging munyin teluktaké,celekutan
Sawiréh pancorané kaengsutin plastik lan tain kucit
Yéhné itek malanyat tambis nyat
Batuné nungging nyeluing nyuun softéx
Lantas kija lakuna inyalian,i kakul lan i cueng?
Badah....
Buin kesep yén tuah sing resep
Yéhé ilang kakeberang ambu putih
Jelingjingé tuh cara anak ubuh
Cariké telah dadi umah
Subake?
Pakpak lubak di perpustakaan!
Olih : E.Senaya, Karangasem
15. Tresna Magantung
Tresnané layu dimuncuk tunjungé putih
Tuh aking,tan payéh tan pagetih
Sawiréh telagané enyat nyarétcét
Ulung ka pangkungé dalem
Ditu I Enggung Poléng mangedékin
Dadi melénan tanahé dini
Belig turmaning alid
Alid ulian getihé, ngendih
Ngahngah,nandang jengah
Tan sida nyuhjuh bulané
Engsut di carang kayuné ligir
Nirdon saja
Tresnané magantung
Kaéwérin olih Idedalu
Ané lekad uling selagan batisé
Milu mangiladin mata
Ngawinang manahé sayan lanyah
Olih : E.Senaya, Karangasem
16. Sasikep
Poos beli raris olés
Ring selag alis adi,gelis
Poos panadi baos
Mangda adi anut-tinut
Ring baos beli
Layahé silap-silapang
Ring gidaté, adi
Mawastu kedat dahat
Layah pinaka ajah
Mangda adi tan obah
Satya ngayahin beli
Ngembeng eling adi
Waluya segara madu
Kecap sugiang amatra
Ring muan beli arupa
Panyupat mala baya
Sidi karya panumaya
Nyarétcét Panyingakan adi
Waluya segara pitu
Usapang sabilang buku
Pinaka paiket—ruket
Sasikep beli sirep
Mangda dedep
Setata éling ring adi
Olih : E.Senaya, Karangasem
17. Sunia Kanti
Rikala engseb Sanghyang Surya
Taru nyuti rupa dados méru
Sanghyang Candra pinaka Surya
Manyunarin sepi
Eningang kayun ngulati sujati
Majalaran sunia pinaka kanti
Ring payogan Sanghyang Saka
Olih : E.Senaya, Karangasem
18. Buang Ngetél
Ulah laku ngaba buang
Ulah ningkang aluh ngangkang
Lebihan néngél ogél-ogél
Ngetél néltél
Cokcok kedis
Rejeng bakis
Kebas-kebis
Uyak nanah
Benyah lanyah
Nandang jengah
Ka gumi wayah
Ulian buang ngetél
Olih : E.Senaya,Karangasem
19. Campah Ampah
Lebihan campah
Munyi tawah-tawah
Krabak-krubuk tan paunduk
Ngéa ibuk
Cara kuluk
Papaloné bangras
Tatuwekné tan pedas
Liat sengap
Ambek rengas
Kereng tungkas
Lebihan ampah
Tuara resep gumi wayah
Ngadu begug,glebag-glebug
Ulian pelud
Baya silib teka rarud
Daya calig mangelurug
Ngaé gerubug
Ulian campah turmaning ampah
Olih : E.Senaya, Karangasem
20. Sikutang Di Awak
Awak nu pada nyokor
Pragat makenying ulian atékor
Nyén lakar jebuhin
Awak nu tuna dikelus
Buka pitiké belus
Eda nagih dadi angin ngalilus
Awak enu saja engab
Eda nagih cara geruda ngabkab
Congah munyi,ngungkab tattwa
Nanging isiné patigadab
Dadi jatma tong dadi engsap
Metu inget tekén awak
Apang bisa nyikutang di awak
Olih : E.Senaya, Karangasem
21. Jelema Boya-Boya
Boya ulian lengit
Mula nyaliné pengit
Payu ulian ngelamit
Wareg ulian gedeg demit
Boya ja kena bebédan
Dadi demen maméda
Demen ngulgul timpal
Demen takutin timpal
Ngadu siteng,tengal
Boya ja kedengang palekadan
Dadi kereng maboya ngandang
Mirib paileh gumi katibén baya
Jelemané demen né boya-boya
Olih : E.Senaya, Karangasem
22. Brahma Santi
Ulian pituduh,Ida kasengguh
Sang Sané Ngawi sami dumadi
Ala-ayu tuah pakardi Ida Sané Ngawerdi
Kasungkemin saider buana sami
Ulian paileh mabuat sungsut
Panumaya,pakolih lara dumadi
Tan kedeh las nuleb asiki
Pageh satinut titah Sang Sujati
Pinaka margi sampunang lali
Brahma kanti ngaluruh santi
Olih : E.Senaya, Karangasem
23. Yatnain
Eda uyut yn takut benyut
Patilesang ngaba bungut
Yén nu demen naar jukut
Tusing pati jutjut
Apang tusing ngaé sungsut
Raos di sisi pedas-pedasang
Eda ulah mamunyi
Apang tusing pelih ngaba bungut
Tusing tawah ngaba itungan
Apang tuara Tungap mani puan
Yatnain singsal laksana
Pedas liat,kuping di samping
Apang kasengguh jatma maunduk
Olih : E.Senaya, Karangasem
24. I Ketut Pengkuh
Kalain tundangan,inguh
I Ketut pengkuh
Kirak-kirak
Sebak-sebak di rurungé
Nigtig tangkah wayah
Wiréh punyah
Bungutné kembah
Kerem arak
Béh, tetedan kala bakat untal
Kutal-katil ngitukang layah
Léak barak bakat gerak
Bungut uug,uyak kacakcak
Tut eda pengkuh
Suud mabuat ora
Braya kanti ulati
Mani puan,sinah pangguh
Sawitra sané sujati
Olih : E.Senaya, Karangasem
25. Buduh Aluh
Gumi landuh
Ébuh uli aluh
Sing nyak tuyuh
Ulian buduh
Yén sing milu buduh,sinah pakéwuh
Buduh kasub lobané murub
Kasub amah pisuh
Rusuh tur jaruh
Eda tandruh
Tuah makejang ajak buduh
Ulian aluh
Olih : E.Senaya, Karangasem
26. Mabakti Ring Pura
Marep hatur tiang mabakti
Ngaturang sembah majeng ring hyang widhi
Suara gentene kadi sunari
Lan suara kidunge saling pesautin
Pelinggih ring pura tegeh nyujuh langit
Barak putih selem tri warna
Malebur sami dados siki
Ang Ung Mang kara manunggil
Malambang Ong kara murti
Ngacep karahayuan gumi
Wangsa muah negari
Landuh rajeng kerta sami
Olih : Ida Ayu Dwi Puspasari Mas
27. Bali
Bali...
Pulo sane cenik...
Pulo sane akeh antuk budaya..
Pulo sane akeh antuk pariwisata...
Budaya Baline sampun kaloktah ring mancanegara
Igel-igelan miwah gamelan soroh budaya Bali
Pendet, Kecak miwah Baris..
Soroh igel-igelan Bali
Cerik kelih gede tua malajain igel-igelan Baline
Pariwisata ring Bali becik...
Pariwisata alam miwah bangunan
Gunung, Danu, Pasisi wenten ring Bali
Gunung Batur, Danu Batur, lan Pasisi Kuta..
Soroh tongos wisata ring Bali
Baline sugih..
Sugih budaya lan pariwisata
Krama Baline patut ngelestariang budaya Baline
Olih : Parisudha
28. Semeng
Suryane endag manyuryanin.
Ketelan damuh ngulangunin.
Munyin kedise saling pasautin.
Karuyuk siape sane ngamaluin.
Anget-anget, angin dingine ngampehin.
Bamban ayu saling asihin.
Suarga lokane buka nindihin.
Nginyah, kijap-kijap, ambune pabalihin.
A gelas teh anget tusing kalempasin.
Tekek gisiang gerosin.
Semenge ene sida kaluwihin.
Dasarin sakeng ati sane luwih.
Olih: I Wayan Kertayasa
29. Luwu
Dini ade luwu.Ditu ade liu.Ane ngae bengu.Sing ade ngarungu.Ah..., mare wawu.Men jani enu.Jelenjingane masi ngemu.Margine milu beru.Keweh yen ajak liu.De nyen milu.Awige sube dini ditu.Sing masi ade rungu.Ane jelek bengu, ento sube luwu.Nyakitin nekang pikobet, masi luwu.Ngusak gumi masi luwu.Milu dadi luwu?
Olih: I Wayan Kertayasa
30. Masekolah
Kruyuk…kruyuk munyin siape
Tekak..tekok munyin penginane
Metanda jagat sampun semeng
Sang Hyang Surya menyinarin jagate sami
Kedis-kedis sane menguci
Serase nundun tiang uling ngipi
Titiang metanggi, ngelantas manjus
Taler nyiapang buku-buku pepelajahan
Dina sane mangkin
Titiang jagi ngranjing ka sekolah
Apang polih kaweruhan
Nenten lali,
Mepamit saking guru rupaka
Apang iraga selamet rahayu
Olih : I Putu Aditya Pramana Putra
