Kumpulan Contoh - Contoh Puisi Bali Purwa

Puisi Bali Purwa punika wantah wangun tembang ring Bali sane kabaos sekar, sekar kaperang dados petang soroh, luiripune Sekar Rare, Sekar Alit (Sekar Macapat/ Pupuh), Sekar Madia, lan Sekar Agung.

Kumpulan Contoh - Contoh Puisi Bali Purwa :

1. Sekar Rare / Tembang Rare :

Miong-miong :

Miong-miong, alih ja bikule

Bikul gede-gede, nuin mokoh-mokoh

Kereng pesan ngerusuhin.

Juk meng juk kul 3x

Dija nemeng ditu nengkul

 

Capung Gantung :

Capung gantung tundak-tundak,

Capung engkok lungabedil,

Ngalandok-ngelanting

Basang embok gede ceking

 

Ratu Anom :

Ratu anom matangi mailen-ilen

Dong pirengan munyin sulinge dijaba

Enyen ento manyuling di jaba tengah

Gusti ngurah alit jambe pamecutan 

 

Juru Pencar :

Juru Pencar, Juru... pencar

Mai jalan mencar ngejuk ebe

Be gede-gede 2x

Di sawane ajaka liu 

 

Cening Putri Ayu : 

Cening putri ayu, Ngijeng cening jumah

Meme luas malu, Ka peken mablanja

Apang ada daaran nasi

Meme titiang ngiring, nongos ngijeng jumah

Sambilang mempumpun, ajak titiang dadua

Dimulihne dong gapgapin

 

Merah Putih :

Merah putih, Benderan tiange

Berkibaran dilangite terang galang

Nika lambang jiwa rakyat Indonesia

Merah brani medasar atine suci

Pusaka adi leluhur jaya sakti

Merah putih benderan tiange 

 

Ketut Garing :

Ketut garing, nyeneng di menguwi

Raras cara kuta, semu cara badung

Tindak cara tabanan, tayungane cara denbukit.

Cara denbukit, nganutin denbukit

Boya tiang boya, tiang wang kadungu,

Tiang juru pencar, di arep tiange dungki,

Dungki cenik, misi be kepiting,

Adepa di klating, banga pipis satus,

Nanggu satus tigang benang. 

 

Pangelong : 

Dija bulane sing ngenah uli ibi

Ia jani pules reh majalan ejoh gati *2x

Uli dija bulane majalan, kaki

Uli tanggu kangin teked kauh, keto cening *2x

Pidan lakar bangun bulane tur mai

Lamun ilang kenyelne ya teka lakar buwin *2x

Jenggot Uban :

Kaki kaki ta nguda mabok,

Dibatan cunguhe ked dijagute

Neked kapipine bek misi ebok

Buwin putih buka kapase.

Apa kaki kamulan keto

Mabulu uling dimara lekade

Tusing cening, kaki majenggot reko,

Kaki tua mara ya mentik. 

 

Made Cenik : 

Made cenik,

Lilig montor ibi sanja *2x

Montor badung ka Gianyar *2x

Gadebege muat batu.

Batu cina,

Bais lantang cunguh  barak *2x

Mangumbang-ngumbang I Jodar *2x

I Jodar katetulupan.

Tunjung biru,

Margi I bagus masiram *2x

Masiram saling enggokin *2x

Tepuk api dong ceburin.

Macan rangreng,

Mangelur ngebekin gumi *2x

Kadi kilap manyanderin *2x

Tepuk api dong ceburin.

Jangkak jongkok,

Manyaru manyongcong jakrik *2x

Jangkrik kawi, Ni Luh tama *2x

Ni Luh Tama tunjung beru.

Singa warak,

Gajah lembune macanda *2x

Macanda saling cetakin *2x

Tepuk api dong ceburin. 

 

Bibi Rangda :

Bibi bibi rangda, apang durus karyan bibi,

Bibi majauman, kelod kangin jumah dane jegeg leseng.

Suba jani keto tiang ngaba aled munyi,

Sasanganan kaon, jaja sirat, kekuluban bungan duren.

Duren-duren ijo, sumangkane kuning gading,

Kantilampa nguda, salak, nangka, kaliasem mangaronce. 

Siap Sangkur :  

Siang Sangkur di natahe noltol jagug, gung, gung.

Siap srawah kakak kakak nagih menang, nang, nang.

Awak lacur nagih ngelah montor sangkur, kur kur

Awak pawah nagih milu makpak kacang cang cang. 

Peteng Bulan : 

Peteng bulan ujan bales magrudugan

Peteng bulan ujan bales magrudugan

Katak dongkang pada girang ya mecanda

Kung kek,  kek kung,  kek kong

Kung kek, kek kung, kek kong.

Dingin pesan awak tiyange ngetor.

Dingin pesan awak tiyange ngetor.

Nyemak saput ngojog bale tur melingkuh.

Kung kek, kek kung, kek kong

Kung kek, kek kung, kek kong. 

 

Jangi Janger :

Jangi Janger,  sengsenge sengseng janger,

Sengsenge sengseng janger.

Serere nyomane nyore.

Kelap kelap ngalap bunga

Langsing lanjar pamulune nyandat gading

Jalan jani mejangeran

Seledet enyorina tiyang

Arasijang krangi janger, arasijang krangi janger

Arasijang krangi janger, arasijang krngi janger.

Jangi Janger,  Sengsenge sengseng janger,

Sengsenge sengseng janger.

Serere nyomane nyore.

Kelap kelap ngalap bunga

Langsing lanjar pamulune nyandat gading

Jalan jani mejangeran

Seriang ngentur rora roti. 

 

Ceroring Manggis :

Ceroring Manggis

Belahan batun sawan

Sigemblung, sigemblung

Nyen dorine

 

Curik Curik :

Curik Curik, Semental, Layang-layang

Boko-boko, tiyang meli pohe

Aji satak, aji satus keteng

Mara bakat anak bagus peceng

Unggit unggit.

 

Semut Api :

Semut, semut api

Kija ambahin mulih

Tembok bolong

Saling atat, saling pentil

Ketipat nasi pasil

Bene dongkang kipa

Enjok enjok cunguh besil

Unggit unggit

 

Mecepet Cepetan :

Jalan jani, macepet cepetan

Jalan jani, macepet cepetan

Nanging limane sing dadi gediang

Sejaba ento makejang dadi

Nyen ja bakat, lakar gedig.

 

Ongkek Ongkek :

Ongkek ongkek ongkek

Ongkek kayu lengkong

Enyen jegeg ngontel

Ejuk anggon legong.

 

Sesapi Putih :

Sesapi Putih mangulayang di Taman Sari

Sesapi Putih mangulayang di Taman Sari

Mangungkulin sekar wangi Tunjung Biru

Menyagain i kekupu mengisep sari

Wireh sekar wangi apang eda kanti layu.

Bebek Putih Jambul :

Bebeke putih jambul makeber ngaje kanginan

Teked kaja kangin, ditu ya tuwun mekelang

Briyak-briyuk msileman (2x)

 

Kotak Wadah Gerip :

Kotak wadah gerip

Jaja megenepan

Ane luwung luwung

Megenep isine

Apang ada aji satus

2. Sekar Alit (Sekar Macapat/ Pupuh) :

Pupuh Sinom :

• Jenek ring meru sarira

Kastiti hyang mahasuci

Mapuspa padmahredaya

Maganta swaraning sepi

Maganda ya tissning budi

Malepana sila hayu

Mawija menget prakasa

Kukusing sadripu dagdi

Dupan ipun

Madipa hidepe galang

 

• Pakukuh dasar agama 

Panca srada  kepuji 

Sane lelima punika

Brahman sang kaping singgih 

Atman yukti kaping kalih 

Karma kaping telu mungguh 

Samsara kaping empat 

Moksa kaping lima sami 

Bwat sesuduk

Bapa jani maritatas

 

• Ring carike sane linggah 

Pantun nyane sampun kuning

I cetrung ngelah pianak

Nanging kantun alit alit 

Rawuh sang madrebe carik 

Sane benjang jadi durus 

Kaanyi padi punika

I cetrung sedih ngurunik 

Ratu agung

Kengken jani ban madaya 

 

Pupuh Samarandana :

• Baat rasa nyuwun gumi

Luwir di tengah parangan

Segara ngideh sisine

Turin mebet das ngalancah

Upama kadi mentas

Disisin abinge cepung

Pelih tindak payu pejah

• Magantung ban bok akatih

Angkihane yan umpama

Kadi manyuhun gedahe

Matatakan batu lumbang

Yana pelih magunjitan

Tan urungan pacang labuh

Dekdek buyar tan tuptupang

 

• Jeroning manusa urip 

Dini di mretya bawana 

Duang palih ya abahnya

Pertama to dewi sampad 

Ane ngelah abah dewa 

Asuri sampad buin bagus 

Ento agol karaksasan

Pupuh Ginada :

• Bapa bongol tuara bisa

Kewala maan mamunyi

Matauang awak klaran

Anak jani liyu weruh

Bisa mangaduang daya

Ulat asih

Basang awake kiruka

 

• Ede wanen ken rerama

Yening cening suba bakti

Hidupe lakar bagia

Reramane  ento guru

Siaga patut nyayangang

Kadi titi

Sayang I meme ken panak

 

• Dagang sampi ngabe kisa

Dikumane ngajak kaki

Geginane tuah ngabas

Anak sai mule tebu

Punyan tebu misi latah

Yadin kelih

Liu enu papulahan 

 

• Pada bisa ngawe daya

Manis manis mamanesin

Palapanin dadi janma

Eda ngawe peta liyu

Awak kelih nyandang bisa

Teken budi

Pineh pinehin di awak 

 

• Pulau Bali sane aman 

Teken Bali sane asri 

Patut iraga ajegang 

Warisan Para leluhur 

Patut iraga lestariang 

Pulau Bali

Pulau sane mabudaya

• Tiang mlajah ring 

Ekasma Sekolahne luung gati 

Gedungne matingkat dua 

Gurune jegeg lan bagus

Ngranayang titiang tresna

Nenten lali

Ngaturang antuk suksema

 

Pupuh Ginanti :

• Mirib suba liyu tahu

Kadi ne munggah ring aji

Jatin sangsara punika

Wetu saking tingkah pelih

Pelih saking katambetan

Tambet dadi dasar sedih

• Saking tuhu manah guru

Mituturin cening jani

Kaweruhe luir sanjata

Ne dadi prabotang sai

Kaanggen ngaruruh merta

Saenun ceninge urip

• Ring sekolah genah ipun

Telebang janten kapanggih

Malajah seken-sekenang

Eda ja demen malali

Laline maarti engsap

Yen engsap mapuara kali 

 

• Tambe te ngawinang lacur

Bulak balik manumadi

Bingkih malaibin dhuka

Dekah nguber sukan hati

Ngalih idup mati bakat

Ngalih bajang tua panggih 

Pupuh Durma :

• Ne kaparik kaanggen tembang pan tiwas

Mumah nampek negari

Nyabran  ngalih saang

Maring alase wayah

Ring pasar kaadol raris

Jinahe kocap

Kaanggen numbas nasi

 

• Ikigaeg lara nira sang a jagra

Ingete ring raga jati

Jati nikang dharma

Dharma ne mawak sunya

Nyunyari telenging hati

Hati kasrah

Panyerahe puput nampi

 

• Titiang melajah ngae pupuh durma

Pupuh sane luung gati

Ten je sukeh ngae pupuh

Ngae sareng timpal – timpal

Liang rasayang di hati

Diastun liang

Ngae pupuh durma kenjel gati

 

• Titiang demen gati mbalih wayang 

Wayang sane uli Bali

Mebalih di desa Pau

Dalange saking Kamasan

Diastun ujan – ujanan

Atine liang

Sebet atine wayange mulih 

Pupuh Dangdang Gula :

• Saksat ratu nuduk pitik bengil

Mami lara

Nyapat pitra ksasar

Gela-gela ring kawahe

Urip titiang sampun lampus

Keto upaminya adi

Manyadia mamarekan

Ni Nyonyah raris masaur

Minab tan wenten utang tiang

Memarekan

Ring beline kadi mangkin

Sarat tuduhing batara

• Titiang takut kena munyi manis

Ngaku tresna

Gampang nagih nadtad

Anak eluh uli dini

Bantangin ban slaka siu

Joh para bakatang beli

Saling ke aji kemikan

Makemulan galir bungut

Dija pacang saup jemak

Tuyuh ngucap

Ngadenan suba manengil

Pang da nundun dakin basang

• Mesok gedenan bikas beline dini

Ngodag-odag

Marasa teken awak

Suba ririh di gumine

Pepes menang bane buruh

Nasi matahan kadung lekin

Bibih galir crewet pisan

Tuara nyandang kapigugu

Lawar gerang eda nyagerang

Dasar meka

To beli jani rasanin

Damar langit meh bulanan

• Durung puput marerasan sang kalih

Laut teka

Madan I Congliwat

Utusan mapag Ingtai

Mangda gelis Nyonyah mantuk

Dening wenten raos pingit

Ni Nyonyah misadyayang

Pacang gelis mantuk

Kapiragi ya Ni Nyonyah

Gelisahan

Irika raris I Sampik

Kroda idepnya kalintang

 

• Buin pidan manyi padi kuning

Manyidayang

Kadi makunyit di alas

Katemu lamun idepe

Sarin tanah tiang ibuk

Blahan payuk bas bebeki

Beruk tanah sarat pisan

Dakin karna uling ilu

Daluang bisa ngumbara

Mangulayang

Kayun ira tumas manik

Jeron dewa ampurayang

Pupuh Mas Kumambang :

• Cai Tarka

Kar ke took ngabe pipis

lakar meli jaja

Beliang meme abesik

Dimulihne magagapan

 

• Cening Komang

Cening Dharma pelajahin

Eda cening nakal

Bapane sai nuturin

Krana cening panak bapa

 

• Bunga kertas

Nike bunga pulau 

Bali Wenten akeh warna 

Bunga sane paling suci

Bunga kertas, Bunga sayang.

 

• Rasa sayang

Rasa sayang ne di hati

Nike madan tresna 

Rasa tresna ne sujati 

Rasa sane paling liang 

 

• Belog pongah

Keto solah nyane yukti

Tusing ngelah daya

Satata gawennya pelih

Nanging tusing ngelah jengah 

Pupuh Mijil :

• Dadong dauh ngelah siap putih

Ba mataluh reko

Minab suba limolas taluhne

Nanging lacur ada ne nepukin

Anak cerik-cerik

Liwat usil ipun

Pupuh Pangkur :

• Rawuh maring taru juar

Ne ngarembun daunnyane kasilirin

Antuk angin aris nyursur

Pan suka nuli mabahan

Tan asuwe mangengkis ipun aturu

Saget prapta buaya galak

Ngrepe saking tukad alit

• Sujati ning sadu dharma 

Nyadia ngungsi rahayune mangda punggih

Duluraning karma patut

Idep teleb ring kadharman

Rawos dabdab mupuhang kadang manyulur

Anggen titi manyinahang

Iwang patut mangda uning 

 

• Subalang jani di manah

Buka cening malajah sanune urip

Nika wenang nomer satu

Nanging pang satya dimanah

Eda ganjih

Ne plajahin malu hitung

Apang da nuwut ne iwang,ngundukang beneh ne pasti

Pupuh Pucung :

• Bibi anu lamun payu luwas manjus

Antenge tekekang

Yatnain ngaba masuwi

Tiyuk puntul

Bawang anggon pasikepan

 

• Anak Liu

Bencana di marga agung

Bajang ulu bukal

Mangisep nyonyo ngulanting

Mangetekul,

Makrama tan pesu empehan 

• Ring SMU

Tiang masuk, ajak liu

Gedunge matingkat

Timpale ade luh muani

Bapak Guru

Ngicenin papelajahan

 

• Mangkin masuk

Tugase nyatet ring buku

Kalanturang maca

Kembangang budi pekerti

Anggen tanggul

malaksana ring sekolah

• Dagang  jamu 

Mangkin tiang meli jamu 

Meli duang gelas 

Janginang base abedik 

Dagang jamu

Ingetang mani medagang

 

• Ni luh Putu

Beli tresna teken iluh 

Tresna apit due

Nanging beli sube ngerti

Ni Luh Putu

Sube ade ne ngelahang

 

• Anak sigug

Anak corah kalud ngagu

Bareng ka sayangan

Kasaratang katulungin

Antuk tutur

Kati dados anak wikan  

3. Sekar Madya :

a. Kidung Dewa Yadnya :

• Ida ratu saking luhur

Kawula nunas lugrane

Mangda sampun titian tandruh

Mengayat betara mangkin

Titiang ngaturang pejati

Canang suci lan daksina

Sarwa sampun puput

Pratingkahing saji.

 

• Asep menyan majegau

Candana nuhur dewane

Mangda ida gelis turun

Mijil saking luring langit

Sampun medabdaban sami

Maring giri meru reko

Ancangan sadulur

Sami pada ngiring.

 

Kawitan Wargasari :

• Purwakaning angripta rum

Ning wana ukir

Kahadang labuh

Kartika panedenging sari

Angayon tangguli ketur

Angring-ring jangga mure.

• Sukaniya arja winangun winarna sari

Sampuni riris samahura ingoling tangi

Rumruming puspa pryaka

Munggwing srenggangning rejeng. 

b. Kidung Butha Yadnya :

• Kidung pangundang ring butha

Basa lumbrah pupuh jerum

Butha asih widhi asung

Caru presajine reko

Genep saha upacara

Manut warna lawan ungguh

Sekul iwak pada bina

Olah-olahan sadulur.

• Pangideran panguripan

Kangin panca putih mulus

Kelod siya barak mungguh

Kawuh kuning pitu enggon

Kaja selem hurip patpat

Manca warna tengah brumbun

Akutus panguripannya

Babutane manut ungguh.

 

• Tangeh anamun turida

Salimur tan kasalimur

Pakerti abayeng dangu

Tumuwuh anadi wong

Rasa tan kadi ageman

Marmanira misreng kidung

Tan anutin pupuh basa

Pina ewa de sang wiku 

 

c. Kidung Manusa Yadnya :

Kawitan Tantri

• Wuwusan bhupati

Ring petali nagantun

Wirya siniwi

Kajrehin sang para ratu

Salwaning jambu warsadi

Presama tur kembang tawon.

• Tuhu tan kenengapi

Pratapa sang prabu

Kesyanirutyen sajnyari

Wyakti yan ari wisnu

Nityangde ulaping ari

Sridara patra sang katong. 

 

• Wetning raja wibhawa

Mas mani penuh,

Makinda yutaning bahudanda

Cri Narendra Cri Singhapati,

Hujaring Mpu Bhagawanta,

Ridenira pancanana,

Bratang kapancasyan,

Hatur Hyang Dharma

Nurageng bhuh.

 

• Kading kreta yuga

Swapurneng nagantun,

Kakwehan sang yati,

Sampun sama jayendrya,

Weda tatwa wit,

Kantinen de Cri Narendra,

Nityasa ngruci tutur,

Tan karaseng wiku hapunggung,

Wyara brantajnya jugul. 

 

• Asahur sembah sira panji

Sama lungguhing patani

Danta nawun mahisa

Wangkawa kinen angambil gunting

 

Pupuh Demung Sawit :

• Tuhwatut bhiseka Nrapati, 

Cri Ecwarya dala

Dala Kusuma patrang lung

Ecwarya raja laksmi

Sang kula hamenuhi rajya

Kwehing bala diwarga 

Mukya sira Kryan Patih

Sang Niti Bandecwarya patrarum. 

 

• Nityaca angulih ulih amrih

Sutrepting nagara

Lan sang para dimantrya

Tuhu widagda nglus bhumi

Susandi tinut rasaning aji

Kutara manawa mwang sastra

Sarodreti matangyan

Tan hanang baya kewuh.

 

• Pirang warsa Cri Nrapati Cwaryadala,

tustangering sana kalang diwa rahayu,

Cri Narapati Lagya gugulingan ring taman,

Ring yaCa ngurddha hangunggul,

Yaya micreng tawang,

Tinumpyatak inukir,

Kamala kinanda kanda,

Langu hinupacareng santun.

 

• Mangemiyat kalangen ikang nagara,

Ticoba awiyar Indra Bhawana nurun,

Kweh tang pakwana titip,

Pada kabhinawa,

Dening sarwendah linuhung

Liwar sukanikang wong,

hanamtami kaapti,

harumpukan sari sama

angrangsuk bhusananeka marum. 

 

• Sakuwu kuwu mangkin suka,

Ramya mahotsawa,

Munyang tabe tabehan

Sinamening gending curing,

linawu wina kinidungan

Swapitaning ratna wadhu,

Lagya nawung rasmi, Sinang

yoga dening yayah indung.

 

• Hentryarsa Cri Bhupati Mulat,

Wilacanikang wwang,

Sajalwistyarsa handulur,

Kadangnya nawung ragi,

Ramya sopacara langu,

Tut marga amijamijah,

Wruh Cri Maha Bhupati,

Nora suka madani sinawung. 

 

• Tan koningeng ratri henjing

Cri Narendra wus ira asnana,

Mentas asalin kampuh petak

Halus botlor acri,

Tekaning sabuk waja bresih

Panwahwa susur,

Lumekas amuja,

Munggwing maharidanti,

Ryagraning wukir-wukiran,

kinusa ring wekuntang dekung. 

 

• Wruh sireng tatwa samadhin

Deha cudha, sanustana

Sanghyang Sopakaranya

Huwus, nangarasmerti

Tumuli mijil Cri Narendra,

Sampun angrangsuk kaprabun,

Hadikara abhra sumunu urnabhugaçri,

Tuhu sang Cri Haridara,

Penuh tang mas manikeng bapuh. 

 

d. Kidung Pitra Yadnya :  

• Mamwit narendratmaja

Ring tapowana manganjali

Ryyagraningindra Parwata 

Tan wismreti sangka nikang

Hayun teka

Swabhawa sang sajjanarakwa

Mangkana.

 

Pupuh Aji Kembang : 

• Ring purwa tunjunge putih  

Hyang iswara dewataniya

Ring papusuh genah hira

Alinggih sira kalihan

Pantes ta kembange petak

Ring tembe lamun dumadi

Suka sugih tur rahayu

Dana punia stiti bakti

 

e. Kidung Rsi Yadnya : 

• Aswa memurihang bukti

Away gila pamyakteng suci

Campur samya jnanaputusing

Sarwa budhi yan ring Siwa

Suda sri danta padan ipune

Ringring ayu pantan rwa

Sang hredi tri aksara 

Temah ongkara tri kona

Ri wekasing tuduh

4. Sekar Agung ( Kekawin atau Wirama ) :

Wirama Tobaka :

• Sasi wimba haneng ghata mesi banu

Ndan-asing suci nirmala mesi wulan

Iwa mangkana rakwa kiteng kadadin

Ring-angambeki yoga kiteng sakala.

Wirama Sronca :

• Hana sira ratu dibya rengon

Prasasta ring rat musuh nira pranata

Jaya pandita ring aji kabeh

Sang dasaratha nama tamoli

 

• Sira ta tri Wikrama pita

Pinaka bapa bhatara Wisnu mangjanma

Inaka nikang bhuwana kabeh

Ya ta donira nimitaning janma

Artin nyane :

Ida wantah ajin Sang Hyang Tri Wikrama

Kanggen aji rikala sang Hyang Hari manumadi

Jaga ngerahayuang jagate sami

Sapunika tatujon Ida mawinan manresti

 

• Gunamantra Sang Dasaratha

Wruh sira ring Veda bhakti ring Dewa

Tar malupeng pitra puja

Masih ta sireng swagotra kabeh

Artin nyane :

Lewihing guna Ida Sang Dasaratha

Wikan Ida ring Veda bhakti ring Dewa

Tan lali Ida ngastawa Sang Hyang Pitara

Sweca Ida ring sameton Idane sami 

Wirama Wangsastha/Swandewi :

• Prihen temen dharma dhumaranang sarat

Saraga sang sadhu sireka tutana

Tan-artha tan kama pidonya tan yasa

Ya sakti sang sajjana dharma raksaka.

Wirama Merdukomala :

• Ong sembahninganatha tinghalana de tri loka sarana

Wahyadhyatmika sembahing hulun ijongta tanhana waneh

Sang Iwir agni sakeng tahen kadi minak sakeng dadhi kita

Sang saksat metu yan hana wwang ngamuter tutur pinahayu

Artin nyane :

Ratu Sang Hyang Maha suci, pangabhaktin titian inista suryaning ugi, santukan wantah paduka Bhatara kantin jagat tigane

Sekala nikala pangabhaktin titian ring paduka Bhatara tan wenten tiyos

Paduka Bhatara kadi geni mijil sakeng taru sane letuh, kadi minyak mijil saking santene

Paduka Bhatara nyalantara medal yening wenten anak ngincepang tutur kabecikan pisan

 

• Wyapiwyapaka sarining purama tatwa durlabha kita

Icchan tangha tan hana ganalalit lawan hala hayu

Utpatti sthitti linaning dadi kita ta karana nika

Sang sangkan paraning srat sakala niskalatmaka kita

Artin nyane :

Nyusup ring sahaning sarwa bhawa meraga sariningtattwane sane mahuttama, sane sengka pikolihang paduka Bhatara

Saking pani ah paduka Bhatara punika, sane wenten sane tan wenten, sane ageng sane alit, miwah kawon becike punika

Lekad hidup matinnya sang numadi, paduka Bhatara ugi maka lantaran ipun

Paduka Bhatar meraga sangkan paraning jagate sami, sekala niskala paragayan paduka Bhatara

Wirama Rajani/Mandamalon :

• Artha ripejah nikang Tri Sira sighra hulunya tiba

Dadi ta maso masenghit ikanang kara Dhusana weh

Saha bala manglayang kadi tamegha katon ahireng

Karatala kadga cakra winawanya ya tulya kilat

Artin nyane :

Risampune padem I Trisirah gelis tenggek ipun ulun

Dados nyagjag nguwales ipun sang Kara miwah sang Dusana

Rawuhing prajurit ngindang waluya gulem kanten ipun selem

Pedang, keris, cakra baktan ipun punika saksat tatit

 

• Hana mamanah waneh kadi ta bajra panahnya bisa

Talinipanahnya rodra kumupak kaharan gelapa

Raghu suta bayu bajra ya padhani panah nirabap

Yata kumenekanang kala tiba sahananya pejah

Artin nyane :

Wenten malih niwakang panah tan bina kilat panah ipun maupas

Talin panah ipun kabinawa ngrebek tan pedah suaran kilat

Panah Ida Sang Rama walua bayu bajra akeh pisan

Punika sane ngenen I Raksasa ulung sakatah ipun padem

Wirama Sikarini :

• Kunang sang wwang nissreyasa sira tatan siddhiringulah

Nda tan puja tan yoga rinegepira nisbhawa sada

Luput sangkeng bhawa karma pati hurip tan panga-wara

Apan saksat sangkan paranika sira cintya bhawana

Artin nyane :

Anake sane ngemanggehang nirasraya tusing sidha sajeroning laksana

Nenten ja puja nenten ja yoga ane ening, sakewenten ida setata ngamanggehang kadyatmikan

Luput sakeng palinder suka duhka, mati hidupe tusing ja ngaduk-aduk

Dwaning satmaka pasuk wetu ida, Ida sampun paragayan Acintya bhawana

 

• Sireka drwaya jnana tiga huriping bhumi sahana

Bangun phalweng wwai tan milu banu sireng duhka suka ren

Guna neka lit tan lega maseki nglwabhuta temen

Ageng tan mopek manjingi ngahetika suksma sumilib

Artin nyane :

Ida punika sane madrebe jnyana tiga, hurip gumine makejang

Waluya jukung di toyane, nenten milu teken pajalan toyane sane pinaka suka duhka

Pigunan idane alit, sakewanten nenten goloh macelep (ngeranjing) ring genahe sane linggah, ngagawokin

Ageng sakewanten nenten kelet macelep (ngeranjing) ring genah sane cupek (alit), dahat suksma tur singid

 

Wirama Sardula Wikridhita :

• Ambek sang paramartha pandita huwus limpad sakeng sunyata

Tan sangkeng wisaya prayojananira lwir sanggraheng lokika

Siddhaning yasa wiryya dinira sukaning rat kininkin nira

Santosaheletan kelir sira sakeng Sang Hyang Jagat karana

Artin nyane :

Pakayunan ida sang wicaksana sane sampun mikolihang kaparamarthan, sampun langkung saking sunyata

Boya sangkaning wisaya tatujon ida kadi sane sampun ketah sajeroning desa pakraman

Kasiddhan yasa miwah kapurusanne saratang ida, miwah karahajengan jagate sane bobot utsahayang ida

Degdeg kahyun ida yadiastun mabelat kelir saking Sang Hyang Siwa

• Um putrangku Bhatara Buddha kinabhaktyanta pramaneng hulun

Swastyastu prabu dharma murti ngusirenta ngraksa dharma sthiti

Apan byakta hilang geleh-geleh ikang ratyankite kandhiri

Panglinggan ri wijita nguni magawe tusta pramaneng jagat

Artin nyane:

Uduh cening putran aji, Pangawataran Sang Hyang Buddha, sane patut bhaktinin, satmaka iwan ajine

Dumadak rahajeg cening jumeneng prabhu, utsahayang paragayan dharmane muwah ngeraksa dharmane apang ajeg

Wireh pastika lakar hilang pakeweh gumine, yan idewa suba nyeneg agung

Pinaka bukti dugas embas ceninge imalu, ngawe suka salwir ane maurip digumine