Satua Bali - I Kambing Lan I Cicing
I Kambing Lan I Cicing
Wenten katuturan satua, I Kambing lan I Cicing, ipun sareng kalih wantah masewitra raket, setata bareng-bareng. Ring pemargin pasawitran ipun sareng kalih wenten singsal duk rahinane anu, santukan I kambing nyilih tandukne I Cicing nanging nenten keuliang nyantos mangkin.
Kacritayang, dumunan I Cicing punika maduwe tanduk, jag mawibawa I Cicing. Nepukin tandukne I Cicing sekadi punika meled kenehne I Kambing ngelahang tandukne ento. Mawinan I kambing serahina ngenehang kenken carane apang bakananga tandukne I Cicing dadi gelahne.
Duk dina anu, I Cicing sareng kambing mejalan sibarengan ring margine, irika I Kambing ngewawanin ngomong. "ih Cicing, icang lakar kondangan kumah timpal icange buin puan, ento tanduk cai melah sajan, dadi silih icang, apang mewibawa apa icang bedik ditu di umah timpal-timpal icange."
Ningeh omongne keto, mesaut I Cicing, "kene nyen Kambing, sujatine icang sing mekita nglepas utawi nyilihang tanduk icange ene tekening anak len." Beh jeg mekeneh ya I Kambing kenken ja carane apang bakatanga siliha. Terus ia ngelemesin I Cicing.
Santukan baan polosne I Cicing, ngomong lantas ipun, "Nah kene nyen Kambing, ne baang icang cai nyilih tanduke ene, nanging ingetan pesan nyen ngulihang yening suba cai teka uli kondangan." Prajani kendel kenehne I Kambing. Pakrimik iya "nah jani suba bakat tandukne I Cicing."
Gelisang carita, suba kone teka I Kambing uli kondangan, nanging ipun mautsaha apang tusing metepuk ajak I Cicing. Santukan I Kambing tusing mekita nguliang tandukne I Cicing. Sabilang lakar metemu, setata I kambing mekelid tur mengkeb lan liunan alasan.
Santukan suba mekelo sajan ipun tusing makatang malih tanduk ipune, pedih ipun I Cicing, aliha I kambing kaumahnyane, tepukina I kambing sedek ngamah di tegalane. "ih Kambing, uliang tanduk icange, suba mekelo sajan silih cai tanduk icange." keto I Cicing ngomong. "Nah sabar nae, mara silih tanduk cai ne gen suba gaya sajan cai, pasti uliang cang, keto saan cai ajak timpal. Sing dadi nang metempo yen silihang. Apang cai nawang, keweh saan ngelesang tanduk caine nenenan, ento mawinan konden nyidang icang nguliang." Keto I Kambing ngomong sambilanga cengar-cengir.
Kacritayang mangkin, suba pedih sajan I Cicing, serahina aliha, tusing masih bakatanga tandukne. Tepukina I Kambing di jalane sedek ngalih amah, megeluran I Cicing, "Kambing mai cutetne uliang tanduk icange." Ningeh munyi keto, melaib I Kambing, terus ubera ajak I Cicing kanti ada di durin I kambinge, ulian gedeg basangne keliwat, ceguta tur ambisa ikutne I Kambing nganti pegat, I kambing terus melaib sambilanga aduh-aduh ulian ikutne juanga ajak I Cicing.
Sekat ento sampun kacritayang I Cicing tusing ngelah tanduk buin, tur I Kambing ikutne bawak ulian juanga ajak I Cicing. Kesengguh mangkin I Kambing demen nyilih nanging tusing demen nguliang. Ulian ento, sapasira sane demen nyilih nanging sing nyak nguliang kasengguh "silih-silih kambing"
Pustaka :
Anonim. (12 Desember 2021). Satua Kambing teken Cicing. Blog Tutlenc. tutlenc.blogspot.com