Satua Bali - I Lutung Teken I Keker

I Lutung Teken I Keker

Nuju dina anu, I Lutung mesusupan ketengah alase. Irika ipun miragiang suaran Keker. Minab I Keker mara teka uli ngalih amah-amahan. Raris I Lutung nyujur katongosne I Keker saha matakon: "Uduh Keker, tulungin apa awake, suba mekelo tusing ngamah, ajak apa icang ketongos ane ada amahan."

I Keker mesaut, "Beh awake tusing ja percaya ajak cai, setata corah ajak anak len."

Ningehang pesautne Keker buka keto, pedih ipun I lutung. raris ipun masaut, "Nah Keker, kaliwat baan iba nyadcad padewek gelahe, yen keto unduke satmaka iba ngadakang awake apang enggal mati."

Engsek I Keker ningeh pesautne I Lutung, mapineh  ipun, "wih saja buka munyine I Lutung, to kan mara orta dijalan dogen, minab tusing ja makejang Lutunge sekadi punika."

Mesaut ipun I Keker, "Nah mani bareng ajaka ngalih amah di pasihe." Kendel ipun I Lutung ningehang buka keto.

Raris kacritayang mani semengne ipun sareng kalih kepasihe ngalih amahan. kekeberan ipun I Lutung olih I Keker katengah pasihe. Akeh ipun molihin be. Kacrita sampun nyancan wengi, malipetan ipun ke pesisi. I Keker memunyi, "Ih Lutung mai suud malu, suba peteng nenenan. Gisiang batis wakene."

Kacrita I Lutung nekekang ngisiang batisne I Keker, nganteg ipun ring pasisi. Raris I keker malih memunyi, "Ih lutung lebang batis awake." Nanging santukan I lutung mula saking jailne, sing ja lebange batis I Kekere, nanging malih tekekanga saha mutbut bulune I Keker.

Kacritayang I Keker nyaru-nyaru mati. Raris I lutung magedi ngalih saang lan basa-basa. Rikala I Lutung mekaed, irika raris I Keker melaib mengkeb di bete, saha ngeling santukan naahan sakit bulune bubuta. Kacingak ipun olih I Sampi. "Ih Keker dadi cai ngeling sigsig dini?" Raris kacritayang sami olih I Keker. Gedeg basangne I Sampi, raris ipun ngorahang pacang ngwales pabuatne I Lutung.

Kacritayang I Sampi liwat, tepukina ajak I Lutung, "Sampi cai lakar kija ento?" I Sampi mesaut, "Ne icang lakar kesegara lakar ngalih amahan." Malih mesaut I Lutung, "Icang milu sik, suba abulanan icang tusing ngamah-ngamah"

Kacritayang ipun sareng kalih luas kesegara, I Lutung negak diduur tundune I Sampi, risampune ring tengahing segara, I Sampi memunyi, "Ih Tung, icang mememan malu, cai ditu duur batune malu negak!" Raris I Lutung mekecog negak ka duur batune, raris I Sampi ngencolang magedi. Merasa awakne pacang kesengkalen, ngeling I Lutung metulung-tulung, nanging I Sampi tetep kesisi, santukan tetujonne wantah matiang I Lutung burone setata corah teken timpal.

Kacritayang mangkin wenten I Penyu lewat, kacingakin ipun I Lutung ngeling diduur batune padidiane, irika laut I Penyu maekin, saha metakon. "Ih Lutung dadi cai dini ngeling." Ditu lantas I Lutung ngarianin daya ngaenang satua I Sampi edot matiang ipun santukan nenten seneng ring ipun. Kapiwelasan I Penyu, raris katulungin I Lutung, santukan I Lutung ngorahang lakar maang upah yening enyak nulungin.

Sampun raris ipun ring pesisi segarane, mekecog I Lutung. Ngomong I Lutung, "Ih penyu dadi dueg cai ngelangi, apa to mawinan?" Mesaut I Penyu saha masemu bangga tekening dewek, "Ne tangkah icange pinaka tegakan, kepes icange pinaka dayung." Pesu keneh jailne I Lutung, raris ipun metakon, "Tegarang edengan tangkah caine, icang dot nepukin." Beh jeg merasa malih menekan rasa bangga ne ipun I Penyu, saha mesaut. "Nah tulungin icang, badingan sep awak icange, ditu lakar tepuk cai tangkah icange." Raris I Lutung maekin, saha ningting I Penyu, "Gedublag" keto munyine I Penyu mebading. Mepineh I Lutung "Jani suba awake lakar nyate penyu." Ngomong I Penyu, "Badingan awake Tung." Cengar-cengir I Lutung, saha ngredeg I Penyu, ngeling ipun I Penyu santukan ipun inget teken bayane teka. I Lutung cengar-cengir.