Satua Bali - Katuturang Sang Prabu Maruta
Katuturang Sang Prabu Maruta
Kaceritayang Sang prabu maruta, kaliwat kasub di gumine baan kapradnyan Idane. Lenan teken ento Ida Prabu wibuh tan patadndingan. Sang prabu Marutane madeg artu kanjekan Tretayuga. Ida mula terehan manu, Putran Sang prabu Awiksait saking nagara Karandama. Dugas Sang Prabu Karandamane madeg ratu gumine landuh. Sang Prabu dahat pradnyan, nyiwi ngeret indriyan Idane. Ida ngawangun yadnya Aswameda nyantos ping satus, ane kapuput olih Bagawan Angirasa. kewibuhan miwah kapradnyanan Idane masih teken Ida Batara Indra. Yen upamiang Kakiang kawicaksanaan Sang Prabu Karandamane waluya Bagawan Wreaspati. Yen unduk kaprabawan Idane waluya tejan ida Sanghyang Surya. Kadedegan muah kakukuhan kayun Idane tan pendah gunung Himawan. Sang Prabu Karandama kaloktah dijagate mabiseka dadi maharaja. Tri Kaya Parisudane gelarang Ida ngenterang jagate.
Sasubane Ida wata, kagentosin olih putran Idane maparab Sang Prabu Maruta. Yen unduk kapradnyanan Sang Prabu Marutane luwihan teken Ajin Idane ngamel jagat. Yen saihang kakiang sapamadeg Idane waluya Sanghyang Wisnu nyewadi ka mrecapada. Ida Sang Prabu maruta teleb pessan mayadnya muwah nangun kerti. Ida suba mataki-taki lakar nglaksanayang yadnya Aswameda. Panjake suba nikayang Ida ngae bokor muwah eteh-eteh pasuciyan malakar aji mas. Ida lakar nangun yadnya di puncak gunung Merune, dajan gunung Himawane. Watek ratu sajebag Brata wartane makejang ngrombia yadnyan Sang Prabu Marutane. Sang Prabu Maruta sayan wibuh. Apa krana keto? Jani kakiang nuturin cening. Suba kaloktah uli malu para raksasa muwah dewatane. Keto masih putran Ida Bagawan Angirasa ane mapesengan Bagawan Wreaspati muwah Bagawan Samwarta. Bagawan Wreaspati tusing suud-suud nyungkanin kayun Bagawan Samwartane. Ida laut aninggalin saluir padreben Idane ane marupa Artabrana, lunga matapa katengah alase. Bagawan Samwarta ngelarang yoga tanpa busana. Sedeng melaha dugase ento Sanghyang Indra mara pesan suud masiat ngasorang para meseh Idane.
Sanghyang Indra prasida nguwaseyang swargane. Ida laut ngadegang Sang Wreaspati dadi pangentar panegara jajahan Idane. Bagawan Angirasa ajin Sang Wreaspatine mula uli malu suba dadi bagawan kaluargan Prabu Karandamane. Sang Prabu Maruta tusing taen kasorang olih Sanghyang indra, ratun watek dewatane. Pakayun Sang Prabu Maruta mula lakar nyentokang Sanghyang Indra ngamel jagat.
Sanghyang Indra marasa tusing lakar nyidayang nandingin Sang Prabu Maruta, laut Ida nyujur linggih Ida Bagawan Wreaspatine. Sasubane macunduk, Sanghyang Indra laut ngandika: "Ratu pranda Agung, santukan palungguh pranda Agung ngenterang tanah jajahan titiange, sane mangkin wenten pinunas titiange ring palungguh pranda. Ajin palungguh pranda pecak dados bagawatan Prabu Karandama. ne mangkin titiang nunas, sampunang singgih pranda kayun dados bagawanta Sang Prabu Marutane.
Singgih pranda Agung jagi adegang titiang bagawanta ring Indra Loka ngabih titiang dados agung. Palungguh pranda tunas titiang mangda ngastitiang karahajegan para dewatane miwah para leluwur watek manusane. Makadi titiang ne mangkin sampun prasida ngwasayang jagat tigane. Yening sang Maruta ipun nguwasayang mrecapadane kawantena. Wiakti tawah pisan palungguh iratu kayun dados bagawanta Sang Prabu Marunata? Sinah linggih palungguh pranda pacang surud, santukan pranda sampun dados Bagawanta watek dewatane. Ne mangkin titiang nunas mangda singgih pranda nenten kayun kaadegang Bagawanta olih Sang Prabu Maruta." Bagawan Wreaspati laut ngandika: "Inggih ratu Sanghyang Indra, sane nguwasayang jagat tigane. Ragan palungguh iratu maka daging jagate sami. Palungguh iratu sampun prasida ngasorang Sang Amuci.
Sang Swarupa, miwah Sang Wala. Wantah singgih Batara minakraksa rahajegangn para dewatane. Batara sane sawyaktiannyane dados tedung jagat rauh swargane. Titiang sane sampun sueca ida Batara pacang malih manyuwita ring ratu maraga manusa mangkin pirengan atur titiang. Titiang nenten pacang ninggalin palungguh Batara. Titiang nenten pacang ninggalin sane mawasta patut." Sapunika pangandikan Bagawan Wreaspatine. Ida Sanghyang Indra dahat ledang tur digelis mawali lungan ka Indra Loka.
Olih : Aswameda Parwa.