Satua Bali - Sang Sutasoma Dados Caru
Wenten katuturan Sang Purusada, Prabu yaksa ring Ratnakanda. Ida praya ngaturang punagi ring Ida Batara kala, antuk para ratu satus diri. Kocap Ida wawu polih para ratu wantah siyadasa (90) diri nika ngawinang ida nglurug jagat Singhalane praya ngejuk Sang Prabu Jaya Wikrama. Santukan Ida Sang Prabu Jayawikrama kalintang surawira ring payudan, raris yudane rames pisan kadi sagara angalun, swaran kuda, gajah lan raksasane kadi ombake ngrebahang gunung. Dwaning asapunika kayudane, Sang Jayawikrama raris seda, atman idane ngungsi Swarga Loka. Nika ngawinang Sang Purusada kalintang kosekan ring kahiun. Santukan asapunika Sang Purusada nglurug jagat Widarbane, ngantosang Sang Prabu keni cidre raris kabrasta lan kakeberang.
Sasampune jangkep polih ratu satus diri, irika Sang Purusada wau ngaturang punagi punika ring Ida Batara Kala. Ida Batara Kala nenten nerima punagi punika santukan nenten madaging Prabu Astina Ida Sang Sutasoma. Tan suwe Sang Prabu Purusada lan bala wadwaraksane raris nglurug Jagat Astinane praya ngejuk Sang Sutasoma. Kocap Sang Sutasoma duke punika kari kala mapikahiun nabdabang indik karahayuan jagat. Antuk kawelas idane ngaksi jagat Astinane karusak, Ida makahiun nyerahang angga mangda Sang Purusada jangkep naur punagi tur jagat Astinane prasida rahayu. Asapunika wantah kadarman sang nglaksanayang budacita. Patut ngardiang kirti maka larapan mikolihang pamargi nincapang Buda Loka.
Sakewanten Para Tanda Mantri, Baudanda, Raja putrane nenten matur tang kiun Sang Sutasoma asapunika raris sagrehan Kakuruk Setra mapagut ring Bala Wadwaraksa panjak Sang Purusadane. Yudane yukti rames. Bala Wadwa Sang Purusadane lilih, akeh sane kapademang, makadi: Prabu Megada lan Prabu Awangga kasedayang antuk Sang Dasa Bahu. Santukan asapunika Sang Purusada kroda raris mamurti, anggane satsat gunung Maha Meru, Prabu ne rwangatus, bahune rwangewu, sami mangagem sanjata bajra, gada, mosala, cakra, candra asa muwang trisula, tur ngamedalang geni ngalad-ngalad. Balawadwa Astinane akeh sane geseng, pondok, taru, tegal sane nampek ring Kuruksetra sami geseng tan pagantulan. Sang Sutasoma sane kairing antuk Sang Sucitra pinaka sarati ngrauhin payudane ring Kuruksetra.
Sapangrauh ring Kuruksetra kapanggih Sang Purusada kantun mamurti, Anggane ageng ngamedalang geni mangalad-ngalad, irika Sang Sutasoma mangarepang, pramangkin api telas dados toya lintang tis, sami sane padem mawali murip, asing kacingak ri purna malih. Irika Sang Purusada ngujanin Sang Sutasoma antuk panah, nanging sami sanjane mauwah minakadi cakra dados tunjung, kunta dados pudak, langkap dados semining gadung, bajra dados mas manik, mangkin Ida Sang Purusada sampun keni adnyana wimala raris rebah tan sida mamurti kadi jati mula. Sasampune Sang Purusada kasusupan budi satwam, angkara murkan Idane ical raris matangi tur ngelut sukun Sang Sutasoma, nunas ampura miwah nenten makahiun ngaturang Sang Sutasoma maring Batara Kala. Batara Kala ledang pisan raris nyempal Sang Sutasoma antuk sanjata, nanging sami sanjatane ten wenten mintulin, koradane tan sipi raris nyuti rupa dados Naga Agung, nguntal Sang Sutasoma, nanging wawu cokor idane kewanten prasida kauntal sampun marasa kawaregan, dening kasusupan manah suci, loba angkarane matinggal kagentosin antuk welas asih. Sang Sutasoma raris kamedalang, Batara Kala sampun kadi jati mula, raris nyumbah, mapinunas maguru ring Sang Sutasoma.
Pustaka :
Bayem. I.W. (5 Februari 2011). I Lacur. Blog bliyanbelog. bliyanbelog.blogspot.com
Karingkes saking tanjung mekar olih I Ketut Sukrata