Satua Bali - Babaung tekén Bé Jagul
Babaung tekén Bé Jagul
Kacarita ada anak cerik muani, gegaené sai-sai mamaca tur malajahin enta-ental pakaryan anake wikan-wikan i maluan di Den Bukit. Ia paling ririha di désané, ento awinan ia kadadiang panua. Disubané ia matuuh duang dasa tiban, bisa suba ia masiluman apang magoba len, kanti tusing kingetan baana tekén pianakné, muah cicingné madan i jaga, tusing kingetan bana ngadekin boné. Buina ia dueg pesan madewasa, ento kerana ia pepes pesan tekain tamiu luh muani, nakenang dewasa magagaenan, mamula mulaan, mapawarangan muah lenan. Sawireh pagaené muah pituturné tekén anak len melah melah, mawinan ia sugih tur kasub madan balian Sandi. Ia tusing pati ngalapangpipis liu liu, pamuat pangaptiné apang ia paling kasuba di Den Bukit. Ia ngelah pianak abesik, sai sai ajaina, mani puan apang dadi nyan geginan dewekné. I balian Sandi sing nyak kasor tekén balian Sadya musuhné uling cerik. Baliané ento paling tuana di désané, nanging dayané riet.
Sedek dina anu, I Tantra panak balian Sandiné katuturin baan pamangkuné pura Dalem. Pamangkuné koné makatang peti misi ental let let. Entale ento pesuanga diarepan krama désané. Nanging nyang adiri tuaranyidayang negesin kecap sané munggah dilontare ento. Kecap basa dilontare ento kuna pesan, mirip buka né munggah di Raja Puranané. Balian Sadya balian sané kaucap ririh ugase ento masih ia ditu, nanging masih tuaranyidayang negesin nyang abuku, saliun anake ditu tuaranyidayang negesin. Lantas teka ITantra ajaka bapané, I balian Sandi. I balian Sandi maliin entale ento, sambil mangutan dugase maca. Jlemané ané ngiter balian Sandi pada jejeh, nanging nyanané kenyem tur pada kené koné kenehné,
“Ambul apa ya kaririané balian Sandi, padaang tekén balian Sadya, kasub uling malu, tau tekén bongkol bongkol Mantra muah Usada.”
“Nggih.” Buin matakon balian Sadya, “Sapunapi jroné mrasidayang midartayang tegesne?”
“Jro sareng sami, tiang tan mrasidayang pisan negesin kecap entale puniki", mara keto pamunyin balian Sandiné, makejang anake maruyuan,
“Balian Sadya tunian jejeh pesan kadené balian Sandi nyidaaang masanin entale ento, mara tingalina musuhné majujuk tur madekesan makesiab, lantas kenehné dadi kendel pesan".
Lantas petiné ento celepanga ka gook sisin jalané. Sing ada pakenoha mejangan. Mawanan anake pada mulih. Disubané balian Sandi teked jumah lantas ia ka sanggah negak di tongos ibi puané, lantas ia ngomong tekén pianakné.
“Cening, kenken kakeneh baan cening antuk ento.”
“Bapa, tiang suba nawang bapa mapi mapi ngorahang sing nawang, nanging liat bapané nyiriang bapa nawang artin entale ento, tiang ngidih olas tekén bapa, apa isin entale ento".
“Cening Tantra, ané munggah dientale ento mantra mauttama pesan tur tusing ada anak nawang di jagaté. Mantrané ento kasuratang baan padanda ulian mireng pangandika bhatara. Keweh gati bapa maca sakané, krana tulisané suba saru. Nyanan iraga paling lontare ento tur palajain apang sing ada anak ngelahang di jagate".
Nyanan petengné balian Sandi miwah pianakné I Tantra ngamaling entale ento tur palajaina. Tan sué, balian Sandi suba suud malajain entale ento, lantas kulukné anggona conto palajaané. Kulukné lantas punggela, tendasné pegat, lantas punggelané atepanga tur mantraina, kulukné buin idup. Tantra ngon tekén mantra sané munggah di entale ento.
Tantra ngomong kené tekén bapané, “Bapa, tiang dot pesan mati, sakewala buin nyan idupang tyang".
"Cening, da né anggoné palalian cening, mantrané ené sing dadi anggo palalian". mara keto bapané nyautin lantas macegik I Tantra.
"Buih bapa, yen keto sing ja jati jati bapa sakti, bantes mapaidihan keto sing isinina".
Lantas bapané nyemak prabot tur ajaka dua majalan kasisin tukadé, ditu lantas Tantra sepega tekén bapané, sakewala punggelan I Tantra ulung ka tukadé, ditu I balian Sandi jejeh, tur sambil ningalin punggelan I Tantra ané ulung joh di tukadé. Mapan bas kaliwat makelo sing tepuka punggelan ITantra, lantas balian sandi munggel kulukné, punggelan kulukné pejanga diawakné ITantra, tur mantraina. Disubané atep ITantra mapunggelan kuluk tur dadi babaung lantas malaib katengah alasé, ditu balian Sandi maseselan. Punggelan I Tantra ané ulung ka tukadé, kaamah tekén be julité, mara gati amaha punggelané Tantra, lantas neket ditendas be julite tur sing dadi kelesa. Kéto kadadin babaung sané maawak jelema matendas kuluk, miwah bejagul sané mawak be julit matendas jelema.
Pustaka :
Kontributor Wikipedia. “Babaung tekén Bé Jagul”. Wikipedia: Ensiklopedia Bebas. Wikipedia, Ensiklopedia Bebas, 7 September 2021. Web. 1 Maret 2022.
Purwanata, Hendri . (22 Desember 2015). Satua Bali. Blog Hendripurwanata. hendripurwanata.blogspot.com
Proyek Pencetakan Naskah Sastra Klasik Daérah Bali, ed. (1986). Satua Babaung tekén Be Jagul. Denpasar: Proyek Pencetakan Naskah Sastra Daérah Bali.