Satua Bali - I Bikul Ke Swarga Loka
I Bikul Ke Swarga Loka
Duk ane malu dugas treta yuga masa, ada keceritayang Ida Sang Mahayogi sane meraga putus ane mapepasih utawi meparab Waikuntha. Ida Sang Waikuntha meraga mahamuni. Sedina-dina Ida Sang Yogi Waikuntha nguncar Weda Mantra memuja Ida Betara Wisnu.
Keceritayang jani rikala peteng, Ida Sang Yogi Waikuntha ngidupang parapen utawi damar melengis nyuh ditu di purane ento. Disubane keto Ida Sang Yogi Waikuntha metilar budal ke pondok Idane.
Lengis damare ane keanggo ngendihang api di pura linggih Ida Betara Wisnu totonan, anak misi malem. Maleme ento mekada ngundang ia watek para bikul teke kema. Maleme totonan tedane teken I Bikul. Krana kageson baan layahne, ditu lengis damare ento mabreok mure tur kalalah baan apine.
Ditu api damare sayan ngedenan. Di subane apine gede, sinar apine ngeranayang Pura linggih Ida Betara Wisnu dadi galang. Dugase ento Ida Betara Wisnu ledang kayun Idane sawireh ulian I Bikul linggih idane dadi galang, sing ja nu peteng dedet.
Gelisang cerita, sawireh suba maadan patitah karma pala, I Bikul tuah dadi amah-amahan I Lelipi, laut I Bikul mati.
Melesat ngelayang atmane I Bikul nuju Yama Loka. Di Yama Loka, para bala-bala Ida Betara Yama negul tur ngantung atmane I Bikul sawireh bikasne di mercapada.
Risedek para cikra bala Ida Betara Yama ngeretang tali penegul atman ia I Bikul, ditu lantas rauh utusan Betara Wisnu tur ngandika,
" Ih para cikra balan Ida Betara Yama, bani-bani kite negul tur ngantung atman ia I Bikul. Mirib kite ajak makejang sing nawang. Ia I Bikul nenenan parekan Betara Wisnu. Bikule ene stata ngae galang ditu di pura Linggih Betara Wisnu. Dugase ento I Manusa tanpa rungu teken Linggih Ida Betara Wisnu. Sujatine I Bikul nenenan parekan tur bhaktan Ida Betara Wisnu. Lus taline, tur lebang ia I Bikul. Jani ia lakar ajak tiang ke Wisnuloka tangkil majeng ring Ida Betara Wisnu ".
Disubane keto lantas atman ia I Bikul kaserahang ring utusan Betara Wisnu. I Bikul ngiring utusan Betara nuju kayangan Ida Betara Wisnu. Atman I Bikul nemuang bagia sujati ditu di Wisnuloka.
Swen kasewen, suba lantas wates yusane atman I Bikul ditu di Wisnuloka, ditu atmane I Bikul katitah mewali ke mercapada buin. Atman ia I Bikul ketitah numitis dadi putran Ida Sang Prabu ane mahutama ane nyegjegang jagat. Ida Sang Prabu ane mekardi kerahayuan jagat.
Nah keto kone kacerita ia I Bikul ane ngayah tur ngemit perahyangan linggih Ida Betara Wisnu. Sang sapusira ja ane jemet, anteng, ngayah tur subakti tekening Ida Betara Wisnu, riwekas atmane lakar ngungsi Wisnu Loka utawi Suwarga Loka. Buin besikne, yening numitis ke mercapada lakar dadi manusa utama.
Pustaka :
Budiasa, K. (17 Desember 2012). I Bikul Ke Swarga Loka. Blog Rare Angon. rare-angon.blogspot.com