Satua Bali - I Kecut
I Kecut
Wenten katuturan satua madan I Kecut. Jadmane punika sugih pesan, ngelah umah linggah. Kacaritaang I kecut sedeng metekap di umane. Rikala punika teka lantas anak odah ngalih dagdag mewasta Dadong Getget. Diru kone Dadong Getget kau-kauk ngengkusin I Kecut sambilanga ngampig-ngampig kamben cerik, "Kecut, Kecut dija ada dagdag candung?"
"Beh, da ja mai dadong, wireh sampin icange rengas".
"Ah, dija ada dagdag candung Kecut", keto kone buin Dadong Getget.
"Beh, suba orahin tuara baang kauk-kauk enu masih Kecut, Kecut". Baan gedegne, raris gabletina Dadong Getget aji pecut olih I Kecut ngantos mati.
"Beh, Dewa Ratu, ne dadi mati I Dadong, bas melide suba orahin sampi rengas enu masih kauk-kauk nakonang dagdag"
Sawireh I Kecut ining kematian Dadong Getgete lakar liu nelasang prebaya, raris ipun masasangi : "Dadong, Dadong, madak ja Dadong idup lakar anggon tiang joged". Mara baliina masih enu I Dadong mati. Raris ipun masasangi malih : "Yan nyak Dadong idup lakar upahang tiang wayang". Masih I Dadong enu mati.
"Beh Dewa Ratu, cai Kecut umane ento adep asikut, sing sedeng apa anggon nelahin, tur mimbuh salah. Giatang te masesangi!", keto kone timpalne. Buin lantas ipun masesangi :"Dadong, Dadong Getget, idup Dadong nah, lakar anggona ja Dadong kurenan". Beh sajaan idup lantas buin jani.
Nah ne jani te I Kecut, jabin sajaan cai nganggen kurenan. "Beh, meludin ya".
"Ambul tusing anggona kurenan tekan I Kecut, ia lakar mati buin jani". Keto buin timpalne ngorahin.
"Ambul keto lan mulih Dadong, ngorahang teken I meme bapa pada, wireh tiang lakar makurenan, kenken patute anake nyuang kurenan, kadung tiang saud munyi".
Nah sesampune teked jumah raris I Kecut matur teken I reraman ipun : "Peh, meme, icang saud munyi, dadine I Dadong Getget nakonang dagdag candung. Suba kaorahin sampine rengas, enu masih kauk-kauk. Lantas lambet icang aji pecut, tur mati. Suba sangiang anggon joged apang idup, masih enu mati. Sangiang otonin telu bulanin masih mati. Lantas sangiang icang lakar anggon kurenan, mara ipun idup".
Mara mirengang atur pianakne asapunika raris memene mesaut : "Ambul keto keme cai megedi jani, meme tusing demen ngelah mantu tua mangsit buka keto".
"Peh kenkenang icang jani Dadong, keto memen icange".
"Ambul keto Dadong mati jani".
"Da Dadong mati nah, wireh yan Dadong mati, icang ane salah".
"Nah, Kecut, Kecut, mai ja malu". Keto bapanne.
"Lan kene baan madaya Kecut. Ajak I Dadong ngalih tiyingmalu, pesuhunin tiying nyang dasa katih tiying petung. Lamun tusing dadi baana nyuun, buungang ia nganggen kurenan. Yan dadi baana, payu makurenan, keto abete".
Rikala punika raris I Kecut ngengkusin Dadong Getget: "Nah, Dadong, Dadong, kene munyin bapan icange, tundena Dadong ngalih tiying malu, dadi baan nyuun tiying Dadong?".
"Dadi", keto kone pesautne I Dadong.
"Nah lamun keto lan jani ngalih tiying petung adasa katih ngantos muncukne dadiang apesel".
Asapunika raris otina I Dadong tur I Kecut majalan matalang.
Nah bengong lantas I Kecut muah bapanne baan kerengne I Dadong nyuun tiying.
Tur lantas I Kecut matakon teken bapanne : "Kenken abete jani apang buung makurenan ngajak I Dadong?".
"Nah kene abete jani, ajak ia I Dadong mabersih malu di semere, apang ia mati".
"Man kenken Kecut, dadi tusing ajaka pules deweke". Keto petakon I Dadong teken I Kecut.
"Nah, kene Dadong, jani matelah-telah malu aji yeh semer, ambul suba suud Dadong mambuh aji yeh semer, icang mara dadi ngajak pules".
Rikala punika raris Dadong Getget ngalih semer sane dalem sawatara dasa depa tur katututin olih I Kecut. Sesubane nimba yeh ditu lantas I Dadong tuludanga baan I Kecut ngantos ulung turin mati.
Kacaritaang mangkin I Kecut sedeng mewali mulih ngorahang I Dadong suba mati. Nanging lacur teked ipun jumah dapetanga meme bapanne sedang nyakitang basang, tur pangelingne aduh-aduh.
"Beh, kenken adi meme bapa pada nyakitang basang?".
"Pah baan cai ngulungang anake tua ento". Keto pesaut meme bapanne sambilanga ngeling. Anake tua ento idup kone buin tur dadi baana menek. Lantas ipun kaumah I Kecut tur matakon kene : "Kenken I Kecut dadi Dadong tuludang?".
"Tusing, tiang nuludang Dadong apang bersih".
"Maan jani kenken Kecut, payu lakar Dadong anggon kurenan?".
"Beh bas tuane tusing juari icang nganggon kurenan".
"Tusing juari? Nah ambul tusing juari I Kecut makurenan teken Dadong, wastuna katurunan I Kecut apang tusing mupu magae ka carik".
"Dadong suba Batara Sri". Turmaning jegeg sekadi-kadi I Dadong Getget ento, jegeg prajani.
Aduh ditu mapangenan I Kecut, ngantos berag urag-arig mapangenan tusing nyidaang makurenan. Puputne anak jegeg tan sekadi-kadi. Dadong ento Dadong Getget puputne Batara Sri.
Pustaka :
Prayasa, C., Pawitra, M., Wardiapa, K. (16 Maret 2021). Satua I Kecut. www.facebook.com