Satua Bali - Lelipi Selaan Bukit
Lelipi Selaan Bukit
Ada anak muani madan I Tundung, sane luh kurenane madan Ni Blenek. Make dadua makurenan sane megae dadi penyakap apetak tanah gelah Jero Pasek Bendesa. Jero Pasek Bendesa punika, peneke sane nyelapange tekaange uling tongos len teken desa adat anggone ngenepin golongan ring desa Tenganan sane golongan Pasek (nyilih ring desa Ngis) lan golongan Pande (nyilih ring desa Tunggak, Bebandem). Asapunika dadosne Jero Pasek Bendesa baange ayah-ayahan sane marupa apetak tanah sane sakape teken I Tundung. Sesampune makudang-kudang rahina, hasil abian tanahe sane sakape pepes keilangan. Krana pepes keilangan, Jero Pasek sane ngelah apetak tanahe punika ngwelang I Tundung, lantas I Tundung lek tur ngerasa pelih krana nenten bise ngejaga piteket dados penyakap tanah punika. Krana punika I Tundung meled metapa nunas sareng Hyang Kuasa apang icenine kesaktian lan takutine olih manusa.
Mare ia nglaksanayang tapa teka Hyang Kuasa, lan I Tundung nagih makejang pengidihne olih Hyang Kuasa. Gelisin satua I Tundung meled dadi lelipi, yening dadi lelipi ia pasti bise mejaga lemah-peteng ape ane dadi gelahne lan nawang nyen ane suba ngemaling hasil abian uling tanah ane sakape. Dadosne Hyang Kuasa ngabulang pengidihne I Tundung dados dadi lelipi ane enu bise meraosan care manusa. Nanging yening ia suba nawang nyen ane ngemaling hasil abian tanah ane sakape, I Tundung tusing dadi nyegut tur ngematiang anake ane maling, lan manusa ane lenan, lan yening ia ngelempasin ia dados lelipi sejatmane. I Tundung maan kesaktian, dados wentukne dadi lelipi lan nerima pantangan ring Hyang Kuasa. Lantas sesampune makudang-kudang rahina Jero Pasek Bendesa teka ningalin abian sakapan tanah I Tundung lan tepukine lelipi, Jero Pasek Bendesa ngaokin I Tundung, "Tundung, Tundung, Tundung, dije cai?”
“Tiang I Tundung Jero, sane mangkin tiang marupa dados lelipi, tetujonnyane apang prasida nyagain lan nawangin sire sane sampun ngemaling hasil abiane," pesaut I Tundung sane wentukne dadi lelipi. Jero Pasek Bendesa makesyab ningalin wentukne I Tundung sane suba dadi lelipi, lan Jero Pasek Bendesa ngemaang wentukne I Tundung dadi lelipi krana ia enu dadi penyakap tanah lan dadi buruh Jero Pasek Bendesa lan Jero Mesabda.
"Nah Tundung, nanging yening teked pidan ye cai tusing nyidang dadi manusia buin, tusing dadi cai ngusudin, ngiyeg, tur ngancem makejang semeton lan keturunan iyange." I Tundung mesanggup nenten cang ngiyeg semeton lan keturunane Jero Pasek Bendesa.
Sesampune awarsa tur duang warsa, I Tundung sap teken ape ane patut ucapang marupa mantra tur Weda sane kaicenin olih Hyang Kuasa. Sedek dina ujan bales anake ane ngemaling macelep ke abian gelah sakapan I Tundung, krana gedeg tur jengah ia ane wentukne dadi lelipi, I Tundung nyegut anake ane maling kanti mati. Ia lantas bagia krana sampun ngewalesang gedegne, nanging ia masi nyesel krana ia ngelempasin pantangan olih Hyang Kuasa lan lantas I Tundung tetep wentukne dadi lelipi lan tusing nyidahang dadi manusa. Krana wentukne sampun dadi lelipi, ia tusing bani mulih ke desane lan nongos di kubu cenik.
Gelisin satua kurenane ane madan Ni Blenek inguh krana kurenane tusing teka-teka, lantas ia ke abian ngalih kurenane ane tusing teka-teka. Sesampune teked ia lantas ngalinang kurenane tur ngaokin kurenane, "Beli Tundung... Tundung... Tundung..." Nanging I Tundung tusing bani nyautin krana yening ia masaut nyan kurenane takut ninggalin wentukne ane dadi lelipi.
Lantas buin akejepne mare I Tundung bani maekin kurenane tur masaut, "Mai-mai ni kurenan nyaine I Tundung, nanging jani kene wentuk yange ane suba dadi lelipi."
Ni Blenek makesyab krana kurenane suba dadi lelipi lan ia matakon teken kurenane, "Beli, kenape Beli dadi kekene, kanti Beli dadi lelipi, ape ane suba beli laksanaang kanti Hyang Kuasa molihang kekene?" I Tundung lantas nyatuang ape ane ngae ia dadi lelipi.
Ni Blenek sebet ninggalin kurenane dadi lelipi, lan I Tundung masaut, "Jani kene, yening nyai enu meled mulih ke desa kemo ke desa, nanging yening nyai enu satya teken iyang dadi kurenan nyaine tuutin pejalan iyange, ngoyong dini metapa ajak iyang apang nyai bisa dadi care lelipi." Krana satyane jak kurenane, Ni Blenek nuutin kurenane lantas makadadua metapa ngidih ring Hyang Kuasa lan Ni Blenek lantas dadi lelipi.
Pustaka :
Suartini. I.K.Y. (5 Maret 2016). Lelipi Selaan Bukit. Blog Kir Sastra Cerita Rakyat Tenganan. yantiisuartinikirsastra.blogspot.com