Satua Bali - Lutung teken Baduda

Lutung tekén Baduda

Ada koné katuturan satua, I Lutung. Meli kecap misi mica, kocap kacerita luas I Lutung ké tengah alasé sambilanga ngalih amah-amahan. Menek jurang… tuun pangkung joh sawat gumine, konden koné masih I Lutung nepukin amah-amahan ané jaan. sawiréh sing maan-maan amah-amahan sané jaan, makeneh-keneh koné yo buin, apo ané ngeranayang adi sing ado amah-amahan ané jaan? Ditu koné teka I Beduda.

Beduda: "Eh Lutung, apo kepikir ditu betén tiinge? Dini jo negak duur batune!"

Lutung: "Eh cai beduda, ngiyeg-ngiyeg gen cai nah, né waké sedek seduk puk, uli ibi konden maan amah-amahan ané jaan."

Beduda: "beh amah-amahan pikir cai kanti beregidig keto, apo jo ado keto gen kanggoang mapo yo!"

Lutung: "Mih patuhang awak cai jak waké yo, dugas waké nu di kota nak biaso roti lapis jak stek sampi nawang!"

Beduda: "Bo yo keto ngujang cai mai kealase? Sing dempelang naé awak cainé ditu di kota!"

Lutung: "Yee… di kota lamun ado punyan kayu gedé, miwah liu amah-amahan jaan, nyen nawang di alasé liu ado punyan kayu gedé, sing liunang yo ado amah-amahan jaan."

Beduda: "Beh kené bo amun belog ubuhin. Sing tawang cai kayuné di kota telah pagpaga anggona ngaé roti, to bo ané amah cai."

Lutung: "Dija ya ado unduk kayu anggona roti, tawah san cai Beduda…!"

Beduda: "Kayu anggona saang, saangé tunjela anggona manggang roti, sing beneh waké to!"

Lutung: "Beh sing mejalan otak caine, jani nak bo jaman elpiji nawang, boo suud nganggo saang!"

Beduda: "Nah amun keto sing bo cocok cai dini di alase, telah dakin guminé banggaang cai… Mani telah alase, ditu maro cai nawang roti saus alpiji."

Megedi koné iyo I Beduda, kalahina I Lutung pedidiana betén tiinge. I Lutung laut iya sirep, pas sirep ngipi koné iya. Di pengipian I Lutung metemu ajak dagang tuak. Meli koné iya tuak, bayahina aju kuud, amonto dogen koné satuané bawak, jani suba suud.

Pustaka :

Kontributor Wikipedia. “Lutung teken Baduda”. Wikipedia: Ensiklopedia Bebas. Wikipedia, Ensiklopedia Bebas, 11 Desember 2020. Web. 29 Juli 2022.

Demuji. (20 desember 2009). Tuturan Satua. Blog Pang Sing Belog. demuji.blogspot.com