Satua Bali - I Siput lawan I Kancil
Kacrita ring alase, wenten buron madan I Kancil. Ia mabikas jele. Demen melogmelogin timpal, wireh ento ia tusing ngelah timpal, sedina-dina ia tuah pedidi ngitarin alase, ngalih amah-amahan, ngalih yeh di tlagane, tuah gae sane lenan. I Kancil Plaibne becat, wireh ento ia merasa iba paing ririh di alase ento.
Di alase ento masi ada buron sane matungkalikan bikasne ajak I Kancil. Ia madan I Siput, I Siput buron sane cenik nanging dueg lan demen nulungin timpal. Ia liu ngelah timpal, uli semut kanti buaya, mekejang matimpal ajaka I Siput, makrana bikasne ane demen nulungin buron sane lenan.
Sedek dina anu, I Siput ajak timpal-timpalne majalan mulih ngliwatin tlaga. Di tlagane ento masi ada I Kancil sedeng minum yeh tlagane. I Kancil merasa iri teken I Siput ane liu ngelah timpal. "Ih, ape luungne I Siput! Pejalane alon sakadi anak tua, awakne cenik care buron sing taen ngamah" keto ia makeneh.
I Kancil lantas maekin I Siput lan timpal-timpalne. Ditu ia ngorahang lakar malomba teken I Siput. I Kancil nantangin I Siput mlaib ngitarin alase. I Kancil mapikeneh, lamun ia dadi sane paling becat ngitarin alas, ia lakar liu ngelah timpal cara I Siput. I Kancil makeneh ragane pasti menang sawireh Siput nenten bisa mlaib.
Nanging I Siput suba nawang tekening bikasne I Kancil, Lantas ngaukin timpaltimpalne. Pulpulina makejang siput-siput uling alase. I Siput ngarahang apanga siput-sipute mabaris di sisin tlagane, yening I Kancil ngaukin I Siput. Siput ane malunan masaut.
Selisang satua, dinane mangkin I Siput lakar mesaing ajaka I Kancil ngitarin alase. I Siput teken I Kancil suba masiap ring muka alase. Lantas pada mlaib ka tengah alase. Di sisin tlagane majerjer sipute liu pesan. Kanging sawireh I Kancil plaibne becat, ia tusing nepukin sipute liu di sisin tlagane.
I Kancil lantas ngaukin I Siput, "Siput dija caine!" I Siput masaut "icang dini di muka caine... enggalang dik Kancil. Amonto dogen kesaktianne Kancil ane orahange plaibne paling becat!" I Kancil makasiab, lantas ia mlaib kanti ulung, batisne matatu kanti tusing bisa mlaib.
Ditu I Siput lantas nyalip I Kancil. &akejang burone masuryak satekedne I Siput. I Kancil ngeling, "beh, sing payu tiang menang, tusing masi makatang timpal". I Kancil maselselan, nawang dewekne kalah teken I Siput ane orahina plaibne sakadi nak tua lan sakadi buron sing taen ngamah. Nanging I Siput bisa ngalahin I Kancil antuk keduegan ragane.
Pustaka :
